Mai adhura huu, mujhe pura kardo

Apne ahsaas se chhuu kar mujhe sandal kar do
mein ke sadiyon se adhoora hoon mukammal kar do..

na tumhain hosh rahe aur na mujhe hosh rahe
iss qadar toot ke chaho mujhe pagal kar do..

tum hatheli ko mere pyaar ki mahendi se rango
apni ankhon mein mere naam ka kajal kar do..

iss ke saaye mein mere khwaab dahak uthhenge
mere chehre pe chamakta hua aanchal kar do..

dhoop hi dhoop hoon mein toot ke barso mujh par
iss qadar barso meri rooh mein jal thhal kar do..

jaise sehraoon mein har shaam hawa chalti hai
iss tarah mujh mein chalo aur mujhe thal kar do..

tum chhupa lo mera dil aut mein apne dil ki
aur mujhe meri nigaahon se bhi ojhal kar do..

masla hoon to nigaahein na churao mujh se
apni chahat se tawajjo se mujhe hal kar do..

apne gham se kaho har waqt mere saath rahe
aik ahsaan karo iss ko musalsal kar do..

mujh pe chha jao kisi aag ki soorat jaanan
aur meri zaat ko sukhaa hua jungal kar do…….

Advertisement